Uşaq sağlamlığı
Uşaqlarda iştahsızlıq: nə vaxt normaldır, nə vaxt həkimə?
Dişçıxarma və ya infeksiya zamanı iştahsızlıq keçicidir; 3 həftədən uzun davam edirsə və uşaq çəki itirirsə, pediatra müraciət etmək lazımdır.
İştahsızlıq uşaqlar arasında tez-tez rast gəlinən və valideynləri ən çox narahat edən vəziyyətdir. Uşaqlarda iştahsızlıq fizioloji (normal hesab edilən) və patoloji (hər hansı xəstəliyə bağlı) ola bilər.
Hansı iştahsızlıq normal sayılır?
- Dişçıxarma dövründə görülən keçici iştahsızlıq.
- 1 yaşdan sonra böyümə sürəti azaldığı üçün qida tələbatı da azalır və uşağın iştahı əvvəlkindən aşağı olur.
- Əlavə qidaya keçid dövründə yeni dadlara uyğunlaşma ilə bağlı keçici iştahsızlıq.
Hansı xəstəliklər iştahsızlığa səbəb olur?
- Virus infeksiyaları
- Sidik yolu infeksiyaları
- Orta qulaq, burun və boğaz infeksiyaları
- Virus hepatitləri
- Bağırsaq infeksiyaları
- Yuxarı və aşağı tənəffüs yolu infeksiyaları
Bu xəstəliklər zamanı uşaqlarda iştahsızlıq 1–2 həftəyə qədər davam edə bilər.
Nə vaxt mütləq pediatra müraciət etmək lazımdır?
İştahsızlıq 3 həftədən uzun davam edirsə və uşaq çəki itirirsə, bir sıra xroniki xəstəliklər istisna olunmalıdır:
- Vərəm
- Mədə-bağırsaq xəstəlikləri (reflüks xəstəliyi, qastritlər, bağırsağın bəzi anadangəlmə xroniki xəstəlikləri)
- Qurd və digər parazitar xəstəliklər
- Anemiya (qanazlığı) və qan xəstəlikləri
- Onkoloji xəstəliklər
- Qaraciyər, ürək və xroniki böyrək xəstəlikləri
Övladınızda uzun müddət davam edən iştahsızlıq və çəki azlığı varsa, səbəbini müəyyənləşdirmək və əsasında duran xəstəliyin vaxtında diaqnostikası üçün pediatra müraciət etmək lazımdır.