Allergiya: növlərinə görə əlamətləri və mövsümi rinit

Allergiyanın əlamətləri onun növünə görə dəyişir. Allergik rinit zamanı asqırma, burunda, gözdə və ya ağızda qaşınma, burun axması və ya tutulması, gözlərin sulanması, şişməsi və qızarması müşahidə olunur.

Mövsümi allergik rinit nədir?

Yaz aylarında ən çox rast gəlinən allergik vəziyyətlərdən biri mövsümi allergik rinitdir (xalq arasında “saman zökəmi” kimi tanınır). Bu hal əsasən tozcuqlara (polenlərə) qarşı həssaslıq nəticəsində inkişaf edir. Tozcuqlar ağaclardan, otlardan və çiçəklərdən havaya yayıldıqda həssas şəxslərin immun sistemi bu maddələri təhlükəli qəbul edir və histamin kimi maddələrin ifrazına səbəb olur. Nəticədə burun axması, asqırma, gözlərdə qaşınma və yaşarma, boğazda qıcıqlanma kimi əlamətlər ortaya çıxır.

Yaz allergiyasının qarşısını almaq üçün tozcuq səviyyəsinin yüksək olduğu saatlarda açıq havadan uzaq durmaq, pəncərələri qapalı saxlamaq və lazım olduqda antihistamin preparatları qəbul etmək tövsiyə olunur.

Allergiyanın digər növləri hansı əlamətləri verir?

• Qida allergiyası: ağızda gicişmə, dodaq, dil, üz və boğazda şişkinlik, dəridə səpgilər.
• Həşərat sancması: sancılan nahiyədə şişkinlik, qaşınma və bütün bədəndə səpgi, öskürək, nəfəs darlığı.
• Dərman allergiyası: dəridə səpgi və qaşınma, hərarət və ya üşütmə, üzün şişməsi, xırıltı.
• Təmas allergiyası: dəridə qızartı, qaşınma, qabıqlanma.

Anafilaktik şokun əlamətləri hansılardır?

Allergiyanın ağır fəsadı anafilaktik şokdur. Bu zaman aşağıdakı əlamətlər meydana çıxır:

• Huşun itməsi
• Arterial təzyiqin düşməsi
• Nəfəs çatışmazlığı
• Dərinin rənginin dəyişməsi
• Sayıqlama
• Nəbzin zəifləməsi
• Ürəkbulanma və qusma

Anafilaktik şok əlamətləri olduqda dərhal təcili tibbi yardım çağırılmalıdır. Digər allergiya əlamətləri varsa, vaxtında həkimə müraciət etməyiniz tövsiyə olunur.