Hamiləlikdə USM müayinəsi nəyi göstərir?
USM dölün inkişafını, anatomik quruluşunu, ciftin və dölyanı mayenin vəziyyətini göstərir, mümkün qüsurların erkən aşkarlanmasına imkan verir.
Hamiləlik dövründə USM müayinəsi ana və dölün sağlamlığının sistemli şəkildə izlənməsi üçün ən vacib diaqnostik üsullardan biridir. Bu müayinə vasitəsilə dölün inkişaf dinamikası, anatomik quruluşu, boy-çəki göstəriciləri, plasentanın vəziyyəti və dölyanı mayenin miqdarı qiymətləndirilir.
USM həmçinin mümkün anadangəlmə qüsurların, inkişaf ləngimələrinin və hamiləliklə bağlı risk faktorlarının erkən aşkarlanmasına şərait yaradır. Vaxtında və düzgün aparılan müayinə hamiləliyin idarə edilməsində həkimə daha təhlükəsiz qərarlar verməyə, ana və körpə üçün tibbi nəzarəti təmin etməyə imkan verir.
4D rejimli USM nə ilə fərqlənir?
Əvvəllər 3D rejimli qurğularla aparılan müayinələrdə ana bətnindəki körpənin hərəkətləri gecikmə ilə görüntülənirdi. Müasir 4D rejimli USM qurğuları ilə körpənin qaşlarını çatması, gülməsi, əsnəməsi, barmaq əmməsi kimi hərəkətlərini anlıq müşahidə etmək mümkündür.
Döldə hansı qüsurlar ana bətnində müəyyən edilə bilər?
4D fetal doppler müayinəsi ilə döldə ola biləcək aşağıdakı qüsurlar hamiləlik dövründə müəyyən edilə bilər:
- Kəllə və kəllədaxili problemlər: beyin toxumasının inkişaf pozuntuları, beyin boşluqlarının genişlənməsi, başda maye toplanması.
- Üz qüsurları: göz boşluğunun olmaması, dodaq yarıqları.
- Onurğanın inkişaf pozuntuları: beldə açıqlıq, sümüklərdə əyrilik və ya çatışmazlıq.
- Döş qəfəsi və qarın boşluğuna aid qüsurlar: daxili və xarici yırtıq, ağciyər, qaraciyər, mədə-bağırsaq, böyrək və sidik kisəsi problemləri.
- Əl və ayaq sümüklərinin say və forma pozuntuları.
- Dölyanı maye və ciftə aid problemlər: dölyanı mayenin azalması və ya artması, ciftin anormal yerləşməsi.
Döldə hidrosefaliyanın aşkarlanması üçün ən vacib üsul da prenatal ultrasəs müayinəsidir. Müayinə zamanı beyində maye toplanması və mədəciklərin genişlənməsi müəyyən edilə bilər.