Diabetik neyropatiya və şəkərli diabetin digər fəsadları

Şəkərli diabet mütləq nəzarət altında saxlanılmalı olan xəstəliklərdəndir. İnsulin qan şəkərinin tənzimlənməsində mühüm rol oynayan hormondur. Orqanizmdə kifayət qədər insulin istehsal edilmədikdə enerjiyə çevrilməli olan qlükoza qanda toplanır və qan şəkəri yüksəlir. Qan şəkəri nəzarət altına alınmazsa, orqanları ciddi təhlükəyə sala bilər.

Diabetik neyropatiya necə yaranır?

Diabet zamanı yüksək şəkər damarları zədələyir və qan dövranı zəifləyir. Bunun nəticəsində sinirlərin qidalanması pozulur və diabetik neyropatiya yaranır. Müalicə edilməyən diabet sinir uclarına zərər verə, nəticədə hissiyyatın itməsinə səbəb ola bilər.

Hissiyyatın azalması və ayaqlarda təzyiqin artması döyənəklərin (qalınlaşmaların) əmələ gəlməsinə səbəb olur. Bu qalınlaşmalar zamanla yara açılmasına gətirib çıxarır. Qan dövranının zəifliyi və sinir zədələnməsi birlikdə diabetik pəncə və trofik xoraların yaranmasının əsas səbəbidir.

Diabet daha hansı orqanlara təsir edir?

• Gözlər: tor qişanın (retinanın) zədələnməsi görmə problemlərinə səbəb ola bilər, diqqət edilmədikdə isə korluqla nəticələnə bilər.
• Damarlar: qan şəkərini uzun illər nəzarətdə saxlaya bilməyən insanlar damar sərtliyi və damar tıxanıqlığı ilə qarşılaşa bilərlər.
• Böyrəklər: böyrək damarları zədələnərsə, ciddi böyrək problemləri, hətta böyrək çatışmazlığı yarana bilər.
• Cinsi sağlamlıq: diabet kişilərin cinsi həyatına da mənfi təsir göstərir.

Diabeti nəzarətdə saxlamaq üçün nə etmək lazımdır?

• Pəhrizinizə uyğun qidalardan istifadə edin, kompleks karbohidratları seçin.
• Hər gün orta hesabla 30–60 dəqiqə gəzintiyə çıxın.
• Ayaqlarınıza qulluq edin.
• Qan şəkərinizi və xolesterini mütəmadi yoxlayın.
• Ürək, göz və böyrək müayinələrinə laqeyd yanaşmayın.
• Siqaret çəkməyin.
• Hipoqlikemiyadan ehtiyatlı olun.

Düzgün müalicə və düzgün qidalanma xəstəliyi daim nəzarətdə saxlamağın əsas şərtlərindəndir.