Süd vəzi xərçəngi: əlamətləri və erkən aşkarlanması

Süd vəzi xərçəngi qadınlarda ən çox rast gəlinən xərçəng növlərindən biridir və erkən mərhələdə aşkarlanması müalicə baxımından həyati əhəmiyyət daşıyır.

Süd vəzi xərçənginin əlamətləri hansılardır?

• Ələ gələn kütlə: ən tez-tez rast gəlinən əlamət süd vəzisində bərk və ağrısız kütlədir.
• Gilədən axıntı: qanlı və ya şəffaf axıntı xəstəliyin erkən əlaməti ola bilər.
• Gilədə dəyişikliklər: içəri çəkilmə, qızartı, qabıqlanma, simmetriyanın pozulması.
• Dəridə dəyişikliklər: uzun müddət keçməyən qızartı və ya yara, dərinin portağal qabığına bənzər görünüş alması, bir nöqtədə içəriyə doğru çəkilməsi.
• Qoltuqaltı nahiyədə şişkinlik və ya düyünlər.

Belə hallarda mütləq həkimə müraciət edilməlidir.

Erkən aşkarlama üçün nə etmək lazımdır?

Süd vəzi xərçənginin müalicəsində uğur ilk növbədə erkən diaqnozdan asılıdır. Xərçəng hələ bir neçə millimetr diametrində olduqda belə mammoqrafiyada görünə bilər. Müntəzəm mammoqrafiya, ultrasəs müayinəsi və həkim müayinəsi ilə yanaşı, hər qadının öz süd vəzisini tanıması və ən kiçik dəyişiklikdə həkimə müraciət etməsi çox vacibdir. İdeal olanı xəstəliyin əlamətlər ortaya çıxmazdan əvvəl aşkarlanmasıdır.

Risk amilləri və müalicə haqqında nə bilmək lazımdır?

Süd vəzi xərçənginin mühüm səbəblərindən biri genetik mutasiyalardır. BRCA1 və BRCA2 kimi mutasiyaları daşıyan insanlarda risk xeyli yüksəkdir. Ailədə süd vəzi və yumurtalıq xərçəngi, ikitərəfli süd vəzi xərçəngi olan yaxın qohumların olması da riski artırır. Müalicədə şüa terapiyası xəstəliyin təkrarlanma riskini azaltmaq baxımından mühüm rol oynayır.